భారత్‌ ప్రతిష్ఠాత్మకంగా చేపడుతున్న గగన్‌యాన్‌ ప్రాజెక్టులో కీలక ప్రయోగం టెస్ట్‌ వెహికిల్‌ అబార్ట్‌ మిషన్‌ (TV-D1) ఇవాళ ఉదయం 10 గంటలకు చేపట్టనున్నట్లు ఇస్రో ప్రకటించింది. షెడ్యూల్‌ ప్రకారం ఉదయం 8 గంటలకు నిర్వహించాల్సి ఉంది. అయితే వాతావరణం అనూకూలించక తొలుత 8.45 నిమిషాలకు రీషెడ్యూల్‌ చేశారు. కానీ, సాంకేతిక లోపం కారణంగా చివరి నిమిషంలో ఈ వాహననౌక పరీక్షను ఇస్రో నిలిపివేసింది. అయితే సాంకేతిక సమస్యను శాస్త్రవేత్తలు గుర్తించడంతో, తిరిగి ప్రయోగాన్ని చేపడుతున్నట్లు ట్విటర్‌ వేదికగా తెలిపింది. ఈ ప్రయోగానికి కౌంట్‌డౌన్‌ ప్రక్రియ శుక్రవారం రాత్రి 7.30 గంటలకు ప్రారంభమైంది.
2025లో నిర్వహించే గగన్‌యాన్‌లో ముగ్గురు వ్యోమగాములను 400 కిలోమీటర్ల ఎత్తులోని కక్ష్యలోకి ఇస్రో పంపనున్న విషయం తెలిసిందే. మూడు రోజుల తర్వాత వ్యోమగాములను తిరిగి భూమికి రప్పిస్తుంది. ఈ ప్రయోగంలో భాగంగా కొన్ని కీలక పరిజ్ఞానాలపై కొన్నేళ్లుగా ఇస్రో కసరత్తు చేస్తోంది. ఇప్పుడు వాటిని గగనతలంలో పరీక్షించనుంది. మొదటగా టీవీ-డీ1 పరీక్షను నిర్వహిస్తోంది. ఇందులో క్రూ ఎస్కేప్‌ సిస్టమ్‌ సమర్థత, క్రూ మాడ్యూల్‌ పనితీరు, వ్యోమనౌకను క్షేమంగా కిందకి తెచ్చే డిసలరేషన్‌ వ్యవస్థ పటిష్ఠతను పరిశీలిస్తుంది. అలాగే సాగర జలాల్లో పడే క్రూ మాడ్యూల్‌ను సేకరించి, తీరానికి చేర్చే కసరత్తునూ పరీక్షిస్తుంది.
