దేశ రాజధాని దిల్లీ (Delhi)లో దారుణం చోటు చేసుకుంది. ఐఫోన్‌ను చోరీ చేసేందుకు ఇద్దరు దుండగులు ఓ మహిళ పట్ల అమానవీయంగా ప్రవర్తించారు. రోడ్డుపై ఈడ్చుకెళ్లి ఫోన్‌ను దొంగలించారు. ఈ ఘటన ఆలస్యంగా వెలుగులోకి వచ్చింది.
పోలీసులు తెలిపిన వివరాల ప్రకారం..బాధితురాలు యొవికా చౌదరి దక్షిణ దిల్లీలోని జ్ఞాన్ భారతి పాఠశాలలో ఉపాధ్యాయురాలిగా పనిచేస్తున్నారు. శుక్రవారం సాయంత్రం పాఠశాల నుంచి ఆమె ఆటోలో ఇంటికి పయనమయ్యారు. అయితే ఆమె వద్ద ఉన్న ఐఫోన్‌ను గమనించిన దుండగులు దానిని చోరీ చేసేందుకు ఓ ప్లాన్‌ వేశారు. ఆటోలో వెళ్తోన్న ఆమెను రెండు బైక్‌లపై వెంబడించి ఫోన్‌ను లాక్కోవాలని యత్నించారు.
కానీ యొవికా ప్రతిఘటించడం వల్ల జరిగిన పెనుగులాటలో ఆమె ఆటో నుంచి కిందపడిపోయారు. అక్కడితో వదలని దుండగలు ఆ ఫోన్‌ కోసం ఆమెను రోడ్డుపై అలాగే ఈడ్చుకెళ్లారు. వారితో పోరాడలేని ఆమె ఫోన్‌ను వదిలేయడంతో వారు అక్కడి నుంచి పారిపోయారు. ఈ ఘటనలో ఆమె ముఖానికి తీవ్ర గాయాలయ్యాయి. ప్రస్తుతం ఆసుపత్రిలో చికిత్స పొందుతున్నారు. బాధితురాలి ఫిర్యాదు మేరకు కేసు నమోదు చేసుకున్న పోలీసులు నిందితుల కోసం గాలింపు చేపట్టారు.
