101
తెలంగాణలో రాగల అయిదు రోజులు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. అయితే ఈ నెల 25, 26 తేదీల్లో అక్కడక్కడా భారీ నుంచి అతి భారీ వర్షాలు కురిసే అవకాశం కూడా ఉందని తెలిపింది. ఈ నేపథ్యంలో ఆరెంజ్‌ అలర్ట్‌ ప్రకటించింది. బంగాళాఖాతంలో ఏర్పడిన ఆవర్తనం ఈరోజు దక్షిణ ఒడిశా పరిసరాలలో సగటు సముద్రమట్టం నుంచి 3.1 కి.మీ ఎత్తులో కొనసాగుతోందని వాతావరణ శాఖ వివరించింది.
కాగా, గత 5 రోజులుగా కురుస్తున్న భారీ వర్షాలకు హైదరాబాద్‌లో కొన్ని ప్రాంతాలు జలమయ్యాయి. వరద నీటితో మూసి నది ఉగ్రరూపం దాల్చింది. దీంతో నది సమీప ప్రాంతాల ప్రజలను జీహెచ్ఎంసీ అధికారులు అప్రమత్తం చేశారు. మరోవైపు హైదరాబాద్ జంట జలాశయాలైన ఉస్మాన్ సాగర్, హిమాయత్‌సాగర్‌లో వరద నీరు పెరగడంతో 4 గేట్లను తెరిచారు.
