యువ నటుడు నితిన్ ప్రస్తుతం రచయిత-దర్శకుడు వక్కంతం వంశీతో సినిమా చేస్తున్న సంగతి తెలిసిందే. కెరీర్‌లో నితిన్‌కు ఇది 32వ చిత్రం. ప్రస్తుతం ఈ సినిమా షూటింగ్‌లో బిజీగా ఉన్నాడు. శ్రీలీల హీరోయిన్‌గా నటిస్తోంది. తాజాగా ఈ సినిమా ఫస్ట్ లుక్ వదిలారు. ఫస్ట్ లుక్‌లో, నితిన్ మునుపెన్నడూ చూడని అవతార్ లో కనిపిస్తున్నాడు. అతను దట్టమైన జుట్టు, గడ్డంతో తన ముఖంపై సీరియస్ లుక్‌తో కనిపిస్తున్నాడు. పోస్టర్‌లో మరొక స్టిల్ లో ట్రిమ్ చేసిన గడ్డంతో కూల్ గా కనిపిస్తున్నాడు.
ఈ ఫస్ట్ లుక్ తో పాటు టైటిల్ కూడా బయటపెట్టారు. ఈ సినిమాకు “ఎక్స్‌ట్రా” అనేది టైటిల్. “ఆర్డినరీ మ్యాన్” అనేది ట్యాగ్‌లైన్. రెండూ కలిపి చదివితే ఎక్స్ టార్డినరీ మేన్ అనే అర్థం వస్తుంది. ఇది ఔట్ అండ్ అవుట్ ఎంటర్‌టైనర్. సినిమా షూటింగ్ 60 శాతానికి పైగా పూర్తయింది. మిగిలిన పనులు వేగంగా సాగుతున్నాయి. శ్రేష్ఠ్ మూవీస్, రుచిరా ఎంటర్‌టైన్‌మెంట్స్, ఆదిత్య మూవీస్ బ్యానర్లపై సుధాకర్ రెడ్డి, నికితారెడ్డి ఈ చిత్రాన్ని నిర్మిస్తున్నారు. హారిస్ జైరాజ్ స్వరాలు సమకూరుస్తున్నాడు. ఈ సినిమాను క్రిస్మస్ కానుకగా డిసెంబర్ 23న థియేటర్లలో విడుదల చేస్తున్నారు.
నిజానికి ఈ సినిమా ఆగిపోయినట్టు గతంలో వార్తలొచ్చాయి. ఆ వెంటనే యూనిట్ అలెర్ట్ అయింది. తమ సినిమా ఆగలేదని స్పష్టం చేసింది. పనిలోపనిగా అప్ డేట్స్ అందించే కార్యక్రమం కూడా షురూ చేసింది. ఇందులో భాగంగానే షూటింగ్ అప్ డేట్స్ తో పాటు, ఫస్ట్ లుక్, టైటిల్, రిలీజ్ డేట్ పై క్లారిటీ ఇచ్చింది.
