దేశాన్ని కుదిపేసిన మణిపుర్‌ మహిళల నగ్న ఊరేగింపు ఘటన మరువకముందే బెంగాల్‌లో మరో దారుణం చోటుచేసుకుంది. ఇద్దరు మహిళలను అర్ధనగ్నంగా చేసి, నిర్దాక్షిణ్యంగా కొట్టారు. ఈ అమానుష ఘటన మాల్దా జిల్లాలోని పకుహత్ ప్రాంతంలో జరిగింది. దొంగతనం చేశారని నెపంతో ఓ గుంపు.. బాధిత మహిళల చీరలు చించి, చెప్పులతో దాడి చేస్తున్న దుశ్చర్య వీడియో ఇప్పుడు సోషల్ మీడియాలో వైరల్ అవుతోంది. స్థానికుల్లో చాలా మంది మహిళలే ఉండటం గమనార్హం.
కాగా, పశ్చిమ బెంగాల్ బీజీపీ చీఫ్ సుకాంత మజుందార్ ట్విటర్‌లో ఈ అమానుష ఘటన వీడియోను షేర్ చేశారు. దీనిపై బెంగాల్ ప్రభుత్వం స్పందించాలని డిమాండ్ చేశారు. ఈ ఘటనపై పోలీసులు స్పందిస్తూ.. వీడియో చూసిన తర్వాతే తమకు ఘటన గురించి తెలిసిందని అన్నారు. ప్రాథమిక దర్యాప్తు ప్రకారం ఇద్దరు మహిళలు దొంగతనానికి పాల్పడ్డారనే అనుమానంతో దాడి చేశారని తెలిపారు. అయితే బాధితుల నుంచి తమకు ఎలాంటి ఫిర్యాదు అందలేదని పేర్కొన్నారు.