తెలంగాణలోని సిద్ధిపేట జిల్లాలో దారుణం జరిగింది. తనకు పెళ్లి చేయడం లేదనే కోపంతో కొడుకు కన్న తల్లిని హతమార్చాడు. దొంగలు ఈ ఘూతుకానికి పాల్పడినట్లు ప్రయత్నించి విఫలమై పోలీసులకు చిక్కాడు. వివరాల్లోకి వెళ్తే.. సిద్దిపేట జిల్లా ములుగు మండలం బండమైలారం గ్రామానికి చెందిన వెంకటమ్మ (45) పాత ఇనుప సామాగ్రి క్రయవిక్రయాలు చేస్తూ జీవనం సాగిస్తోంది. ఆమె భర్త పదిహేనేళ్ల క్రితం మృతిచెందారు. కుమారై శైలజకు వివాహం అయింది. ప్రమాదంలో ఓ చేయి కోల్పోయిన కుమారుడు ఈశ్వర్‌తో కలిసి ఉంటుంది.
అయితే ఒక చేయి లేకపోవడంతో ఈశ్వర్‌కు పెళ్లి కావడంలేదు. ఈ విషయంలో ఇద్దరికి తరచూ గొడవలు జరుగుతున్నాయి. ఈ క్రమంలో మద్యానికి బానిసగా మారిన ఈశ్వర్‌ తన బంధువు రాము సాయంతో తల్లిని హత్య చేయాలని ప్లాన్ చేశాడు. వారిద్దరూ కలిసి ఆమె గొంతును కోశారు. అనంతరం కేసు వారిపై రాకూడదని దొంగలు హత్య చేసినట్లుగా ప్రణాళిక రచించారు. తల్లి కాళ్లను కిరాతకంగా కోసి కడియాల కోసం దొంగలు హత్య చేసినట్లుగా అందరినీ నమ్మించే ప్రయత్నం చేశారు. అయితే సోదరి శైలజ పోలీసులకు ఫిర్యాదు చేయడంతో అసలు విషయం వెలుగులోకి వచ్చింది. ఈశ్వర్‌ ప్రవర్తనపై అనుమానంతో పోలీసులు విచారణ జరపగా ఈ దారుణం బయటపడింది.
