ప్రమాదకరమైన సాహసాలు చేయడం అతడికి సరదా.. అత్యంత ఎత్తైన భవనాలు అధిరోహించడంలో అతడు నేర్పరి. కానీ అదే సాహసం అతడి ప్రాణాలను తీసింది. నెటిజన్లకు సుపరిచితుడైన రెమీ లుసిడి (Remi Lucidi) ప్రమాదవశాత్తు మరణించారు. 30 ఏళ్ల ఈ ఫ్రాన్స్‌ సాహసికుడు 68వ అంతస్తు నుంచి జారిపడి అక్కడిక్కడే మృతిచెందారు. ఈ ఘటన హంకాంగ్‌లో చోటు చేసుకొంది.
హాంకాంగ్‌లోని ది ట్రెగంటెర్‌ టవర్‌ కాంప్లెక్స్‌ను అధిరోహించాలని ప్రయత్నించి లుసిడి మరణించాడు. కింద పడిపోవడానికి ముందు ఈ భవనం 68వ ఫ్లోర్‌లోని పెంట్‌హౌస్‌ కిటికి బయట చిక్కుకుపోయాడు. దీంతో భయంతో ఆ కిటికీని బలంగా తన్నాడు. అతడిని కిటికి బయట చూసిన ఆ పెంట్‌హౌస్‌లోని పనిమనిషి ఆశ్చర్యపోయింది. ఆ తర్వాత అతడి కాలు అక్కడి నుంచి పట్టుతప్పింది. దీంతో నేరుగా కిందపడిపోవడంతో ప్రాణాలు కోల్పోయాడు. కాగా, అతడు అనుమతి లేకుండా ఆ భవనం పైకి ఎక్కడానికి ప్రయత్నించాడని స్థానిక పోలీసులు చెప్పారు.