టాలీవుడ్ లో మరోసారి డ్రగ్స్ కలకలం మొదలైంది. కేపీ చౌదరి అరెస్ట్ తో కొంతమంది టాలీవుడ్ ప్రముఖుల గుండెల్లో రైళ్లు పరుగెడుతున్నాయి. కొన్ని రోజుల కిందట డ్రగ్స్ ప్యాకెట్లతో కేపీ చౌదరి, రెడ్ హ్యాండెడ్ గా దొరికిన సంగతి తెలిసిందే.
ఆ టైమ్ లో చౌదరి నుంచి 80 గ్రాములకు పైగా కొకైన్ తో పాటు.. 4 సెల్ ఫోన్లు, ల్యాప్ టాప్ స్వాధీనం చేసుకున్నారు. ఇప్పుడు ఆ సెల్ ఫోన్లు, ల్యాప్ టాప్ లో ఉన్న సమాచారాన్ని డీకోడ్ చేసే పనిలో పడ్డారు పోలీసులు.
తాజా సమాచారం ప్రకారం, కేపీ చౌదరి మొబైల్ లో ఇద్దరు హీరోయిన్ల కాంటాక్టులు గుర్తించారు పోలీసులు. ఈ హీరోయిన్లతో పాటు, నలుగురు మహిళా ఆర్టిస్టులు, ఒక దర్శకుడి పేరును కూడా గుర్తించారు. సరైన సాక్ష్యాలతో త్వరలోనే వాళ్లను విచారణకు పిలిచే ఆలోచనలో ఉన్నారు.
టాలీవుడ్ లో డ్రగ్స్ కలకలం ఇప్పటిది కాదు. ఆ మధ్య ఈ కేసులకు సంబంధించి ఏకంగా సిట్ విచారణ ఏర్పాటుచేశారు. ఆ టైమ్ లో రవితేజ, చార్మి, పూరి జగన్నాధ్, నవదీప్ లాంటి ఎంతోమంది ప్రముఖులు విచారణకు హాజరయ్యారు. ఈసారి కేపీ చౌదరి మొబైల్ లో ఉన్న ఆ ఇద్దరు హీరోయిన్లు ఎవరనేది సస్పెన్స్గా మారింది.
