చాలా విరామం తర్వాత విజయ్ ఆంటోని ‘బిచ్చగాడు 2’తో మరోసారి విజయాన్ని అందుకున్నాడు. “బిచ్చగాడు” సినిమా, తెలుగు మార్కెట్లో విజయ్ ఆంటోనీకి స్టార్ డమ్ తెచ్చింది. ఎట్టకేలకు మళ్లీ ఈ సినిమా సీక్వెల్ తోనే విజయ్ ఆంటోనీకి గుర్తింపు వచ్చింది. “బిచ్చగాడు” విడుదల తర్వాత, అతను అనేక చిత్రాలలో కనిపించాడు, కానీ వాటిలో ఏవీ కమర్షియల్‌గా విజయం సాధించలేదు. ఎప్పుడైతే “బిచ్చగాడు”కి సీక్వెల్‌ను రూపొందించాలని అతడు నిర్ణయం తీసుకున్నాడో, ఆ వెంటనే అది సూపర్ సక్సెస్ అయింది.
డిస్ట్రిబ్యూటర్‌కి లాభాలు తెచ్చిపెట్టిన ఈ సినిమా తెలుగు మార్కెట్లో బ్రేక్ ఈవెన్‌గా నిలిచింది. నైజాం రీజియన్‌లో ఈ చిత్రం ఇప్పటికే లాభాలను ఆర్జించగా, ఇతర ఏరియాల్లో ఈ వీకెండ్ నాటికి లాభాలు అందించబోతోంది. అటు తమిళ వెర్షన్ “బిచ్చగాడు 2” కూడా డీసెంట్ గా ఆడుతోంది. దీంతో విజయ్ ఆంటోని ఇప్పుడు తెలుగు మార్కెట్లో సినిమాను దూకుడుగా ప్రమోట్ చేయడంపై దృష్టి సారించాడు.
ఈ విజయం విజయ్ ఆంటోనీ ఆత్మవిశ్వాసాన్ని పెంచింది. విడుదలైన మొదటి రోజు బిచ్చగాడు-2 సినిమాకు నాలుగున్నర కోట్ల రూపాయల గ్రాస్ రాగా, రెండో రోజు 3 కోట్లు వచ్చాయి, మూడో రోజు కూడా నికరంగా 3 కోట్ల గ్రాస్ రాబట్టింది. సోమవారం నుంచి కూడా ఈ సినిమా వసూళ్లు తగ్గలేదు. వర్కింగ్ డేస్ అయినప్పటికీ ఆక్యుపెన్సీ బాగుంది. వేసవి కావడంతో మార్నింగ్, మ్యాట్నీల కంటే ఈవెనింగ్ షోలకు ప్రేక్షకులు ఎక్కువగా రావడంతో.. ఆక్యుపెన్సీ తగ్గలేదు.
అటు మార్కెట్లో ఆల్రెడీ ఉన్న అన్నీ మంచి శకునములే సినిమా ఫ్లాప్ అవ్వడం, విరూపాక్ష క్లోజింగ్ కు రావడంతో.. బిచ్చగాడు2కు ఎదురులేకుండా పోయింది. విజయ్ ఆంటోనీ, కావ్యథాపర్ హీరోహీరోయిన్లుగా నటించిన ఈ సినిమాకు స్వయంగా విజయ్ ఆంటోనీనే దర్శకత్వం వహించాడు. అంతేకాదు.. ఈ సినిమాకు సంగీతం, ఎడిటింగ్, కథ కూడా అతడే.