ఏ సినిమా ఎక్కడ?

టాలీవుడ్ స్టార్స్ అంతా బిజీగా ఉన్నారు. కొంతమంది విదేశాల్లో షూటింగ్స్ పెట్టుకుంటే, మరికొంతమంది ఎండల్ని కూడా లెక్కచేయకుండా ఇక్కడే షూటింగ్స్ చేస్తున్నారు. ఎలాగైనా డెడ్ లైన్స్ అందుకోవాలనే కసితో అంతా కలిసి వర్క్ చేస్తున్నారు. ఇక ఈ వారం షూటింగ్ అప్ డేట్స్ చూద్దాం. ముందుగా విజయ్ దేవరకొండతో మొదలుపెడదాం. ఈ హీరో ప్రస్తుతం టర్కీలో ఉన్నాడు. ఖుషి సినిమా షూటింగ్ కోసం టర్కీ వెళ్లాడు దేవరకొండ. అక్కడే విజయ్ దేవరకొండ, సమంతపై కొన్ని సన్నివేశాలు తెరకెక్కిస్తున్నారు. ఓ సాంగ్ షూట్ కూడా నడుస్తోంది. ఇక మొన్నటివరకు స్పెయిన్ లో షూటింగ్ జరుపుకున్న ఈగల్ మూవీ, చాన్నాళ్ల కిందటే హైదరాబాద్ కు షిప్ట్ అయింది. రవితేజ హీరోగా నటిస్తున్న ఈ సినిమా షూటింగ్ శరవేగంగా సాగుతోంది. కార్తీక్ ఘట్టమనేని దర్శకత్వంలో తెరకెక్కుతున్న ఈ సినిమా ఓ డిఫరెంట్ కాన్సెప్ట్ తో వస్తోందంట. అటు భోళాశంకర్ కూడా తగ్గేదేలే అంటున్నాడు. చిరంజీవి హీరోగా నటిస్తున్న ఈ సినిమా షూటింగ్ ప్రస్తుతం హైదరాబాద్ పరిసర ప్రాంతాల్లో జరుగుతోంది. మెహర్ రమేష్ డైరక్షన్ లో వస్తున్న ఈ సినిమాలో మెగాస్టార్ సరసన మిల్కీబ్యూటీ తమన్న హీరోయిన్ గా నటిస్తోంది. అటు పుష్ప-2 కొత్త షెడ్యూల్ మొదలైంది. చింతూరు మండలం మోతుగూడెం అటవీ ప్రాంతంలో పుష్ప-2 షూట్ నడుస్తోంది. ఈ షూటింగ్ చూడ్డానికి ఇటు తెలంగాణ, ఏపీతో పాటు.. ఒరిస్సా, ఛత్తీస్ గఢ్ నుంచి అభిమానులు వస్తున్నారు. ఈ సినిమాలో పాల్గొనేందుకు.. ఆంధ్ర-ఒరిస్సా సరిహద్దులో ఉన్న కుర్రాళ్లకు అవకాశం కల్పించారు. ఎర్రచందనం స్మగ్లింగ్ చేసే దొంగలుగా స్థానికంగా ఉన్న 600 మందికి అవకాశం ఇచ్చారు. ఇక బాలయ్య కూడా అనీల్ రావిపూడి దర్శకత్వంలో బిజీగా యాక్ట్ చేస్తున్నాడు. కాజల్, శ్రీలీల ఈ సినిమాలో హీరోయిన్లు. ప్రభాస్ ప్రాజెక్ట్-కె షూటింగ్ ఫైనల్ స్టేజ్ కు చేరుకుంది. ప్రస్తుతం హైదరాబాద్ లోనే ఈ మూవీకి సంబంధించి ప్యాచ్ వర్క్ షూట్ చేస్తున్నారు. ఓవైపు ఈ షూట్ లో పాల్గొంటూనే, మరోవైపు మారుతి దర్శకత్వంలో సినిమాను కంప్లీట్ చేసే పనిలో పడ్డాడు ప్రభాస్.