ప్రస్తుతం టాలీవుడ్ లో బిజీ హీరోయిన్ ఎవరైనా ఉన్నారంటే అది శ్రీలీల మాత్రమే. పాప ఎన్ని సినిమాలు చేస్తోందో ఎవ్వరికీ తెలియదు. ఈ విషయంలో కన్ఫ్యూజ్ అయ్యే జనాలు కూడా ఎక్కువ. శ్రీలీల పుట్టినరోజు సందర్భంగా ఆమె చేస్తున్న సినిమాలపై చిన్నపాటి క్లారిటీ వచ్చింది. ఆమె సినిమాల నుంచి శ్రీలీల ఫస్ట్ లుక్స్ రిలీజయ్యాయి.
శ్రీలీల చేస్తున్న క్రేజీ సినిమాల్లో ఉస్తాద్ భగత్ సింగ్ ఒకటి. పవన్ కల్యాణ్ హీరోగా నటిస్తున్న ఈ సినిమాలో శ్రీలీల హీరోయిన్ గా నటిస్తోంది. ఇక మహేష్ బాబు సినిమాలో కూడా ఆమె ఉంది. మెయిన్ హీరోయిన్ గా పూజా హెగ్డే నటిస్తుంటే, సెకెండ్ హీరోయిన్ గా శ్రీలీల కనిపించనుంది.
గమ్మత్తైన విషయం ఏంటంటే.. పవన్,మహేష్ సినిమాల్లో శ్రీలీల ది సెకెండ్ హీరోయిన్ పాత్రలే. ఈ సినిమాలతో పాటు నితిన్ కొత్త సినిమాలో కూడా శ్రీలీల నటిస్తోంది. వక్కంతం వంశీ దర్శకత్వంలో ఓ సినిమా చేస్తున్నాడు నితిన్. ఇందులో శ్రీలీల హీరోయిన్. అటు రామ్-బోయపాటి సినిమాలో కూడా శ్రీలీల హీరోయిన్ గా నటిస్తోంది. ఈ సినిమా షూటింగ్ దాదాపు పూర్తయింది.
బాలకృష్ణ, కాజల్ హీరోహీరోయిన్లుగా, అనీల్ రావిపూడి దర్శకత్వంలో వస్తున్న భగవంత్ సింగ్ కేసరిలో కూడా శ్రీలీల నటిస్తోంది. ఇందులో బాలయ్యకు వరసకు కూతురు పాత్రలో శ్రీలీల కనిపించనుంది. అటు వైష్ణవ్ తేజ్ హీరోగా నటిస్తున్న ఆదికేశవ సినిమాలో కూడా శ్రీలీలే హీరోయిన్.
ఈ సినిమాలతో పాటు త్వరలోనే బ్రో డాడీ అనే రీమేక్ లో కూడా నటించనుంది శ్రీలీల. చిరంజీవి హీరోగా రాబోతోంది బ్రో డాడీ సినిమా. ఇందులో చిరంజీవి సరసన త్రిష హీరోయిన్ గా, సిద్ధు జొన్నలగడ్డ సరసన శ్రీలీల హీరోయిన్ గా నటించనుంది. ఇలా బ్యాక్ టు బ్యాక్ సినిమాలతో దూసుకుపోతున్న శ్రీలీల, ఆహా యాప్ కోసం కూడా వర్క్ చేస్తోంది. అల్లు అర్జున్-శ్రీలీల హీరోహీరోయిన్లుగా, త్రివిక్రమ్ దర్శకత్వంలో ఆహా కోసం ఓ ప్రాజెక్టు వస్తోంది.