విజయ్ దేవరకొండ, బాలకృష్ణ, రవితేజ, అల్లు అర్జున్.. ఈ హీరోలు ఇప్పుడేం చేస్తున్నారు, ఎక్కడున్నారు, వాళ్ల సినిమాల షూటింగ్స్ ఎక్కడివరకొచ్చాయి. లెట్స్ చెక్.
ప్రస్తుతం కేరళలో ఉన్నాడు విజయ్ దేవరకొండ. సమంతతో కలిసి ఖుషి సినిమా షూటింగ్ లో బిజీగా ఉన్నాడు. కేరళలోని ఇడుక్కిలో అందమైన లొకేషన్లలో ఈ సినిమా షూట్ నడుస్తోంది. మైత్రీ మూవీ మేకర్స్ నిర్మిస్తున్న ఈ సినిమాకు శివ నిర్వాణ దర్శకుడు. రీసెంట్ గా విజయ్ దేవరకొండ పుట్టినరోజు సందర్భంగా ఓ సాంగ్ కూడా రిలీజ్ చేశారు. అది పెద్ద హిట్టయింది.
ఇక బాలయ్య దగ్గరకొద్దాం. ఈ హీరో హైదరాబాద్ లోనే ఉన్నాడు. ప్రత్యేకంగా వేసిన సెట్ లో అనీల్ రావిపూడి దర్శకత్వంలో సినిమా చేస్తున్నాడు. ఈ సెట్స్ లోనే అర్జున్ రాంపాల్ కూడా జాయిన్ అయ్యాడు. అర్జున్ రాంపాల్, బాలయ్య మధ్య సన్నివేశాలు తెరకెక్కిస్తున్నారు. కాజల్ హీరోయిన్ గా నటిస్తున్న ఈ సినిమాలో బాలయ్య కూతురిగా శ్రీలీల కనిపించనుంది.
అటు రవితేజ కూడా బిజీబిజీగా ఉన్నాడు. కార్తీక్ ఘట్టమనేని దర్శకత్వంలో ఈగిల్ అనే సినిమా షూటింగ్ లో ఉన్నాడు. మొన్నటివరకు ఈ సినిమా షూటింగ్ యూరోప్ కంట్రీస్ లో జరిగింది. ప్రస్తుతం హైదరాబాద్ లో కొత్త షెడ్యూల్ నడుస్తోంది. రవితేజపై కొన్ని సన్నివేశాలు తెరకెక్కిస్తున్నారు.
పుష్ప-2 షూటింగ్ కూడా చురుగ్గా సాగుతోంది. మారేడుమిల్లిలో మొన్నటివరకు ఫహాద్ ఫాజిల్ పై కొన్ని సన్నివేశాలు తీశారు. ఆ షెడ్యూల్ ముగిసింది. ఇప్పుడు మరో షెడ్యూల్, అదే లొకేషన్ లో మొదలైంది. మరికొన్ని జనరల్ షాట్స్ తీస్తున్నారు. ఇక చిరంజీవి కూడా భోళాశంకర్ షెడ్యూల్ పూర్తిచేశారు. మొన్నటివరకు కోల్ కతాలో ఈ సినిమా షూట్ నడిచింది.