సీనియర్ నటులు ఎవరైనా హాస్పిటల్ లో చేరితే చాలు, కొన్ని సోషల్ మీడియా ఛానెల్స్ రెచ్చిపోతున్నాయి. ఎలాంటి సమాచారం కనుక్కోకుండా, సదరు సెలబ్రిటీ మృతి చెందినట్టు వార్తలు రాసేస్తున్నారు. తాజాగా ఇలాంటి వార్తలకు బాధితుడిగా మారారు సీనియర్ నటుడు శరత్ బాబు.
కొన్నాళ్లుగా ఆరోగ్య సమస్యలతో బాధపడుతున్నారు శరత్ బాబు. ఆయన్ను హాస్పిటల్ లో జాయిన్ చేశారు. ఆ తర్వాత పరిస్థితి విషమించడంతో ఐసీయూలో ఉంచారు. దీంతో కొన్ని కోలీవుడ్ మీడియా ఛానెళ్లు, టాలీవుడ్ వెబ్ సైట్లు.. శరత్ బాబు చనిపోయినట్టు కథనాలు రాసేశాయి.
తాజాగా వచ్చిన కథనాలపై శరత్ బాబు సోదరి మండిపడ్డారు. తన అన్నయ్య పూర్తిగా క్షేమంగా ఉన్నట్టు ప్రకటించారామె. అంతేకాదు, శరత్ బాబు కోలుకుంటున్నారట. ఐసీయూ నుంచి సాధారణ వార్డ్ కు షిఫ్ట్ చేశారంట. త్వరలోనే ఆయన పూర్తి ఆరోగ్యంతో మీడియా ముందుకు వచ్చే అవకాశం ఉందని కూడా చెబుతున్నారు.
శరత్ బాబు అసలు పేరు సత్యం బాబు. కెరీర్ లో 600కు పైగా సినిమాల్లో నటించారాయన. కెరీర్ స్టార్టింగ్ లో కొన్ని హీరో వేషాలు వేసిన శరత్ బాబు, ఆ తర్వాత పూర్తిస్థాయి క్యారెక్టర్ ఆర్టిస్టుగా మారారు. హుందాతనం ఉట్టిపడే పాత్రలు పోషిస్తూ, తనకంటూ ఓ ప్రత్యేకమైన గుర్తింపు తెచ్చుకున్నారు.