‘అతడు’, ‘ఖలేజా’ వంటి క్లాసిక్ సినిమాల తరువాత సూపర్ స్టార్ మహేష్ బాబు, స్టార్ డైరెక్టర్ త్రివిక్రమ్ ముచ్చటగా మూడోసారి చేతులు కలిపారు. మహేష్ బాబు కెరీర్ లో 28వ సినిమాగా రూపొందుతోన్న ఈ చిత్రాన్ని టాలీవుడ్ అగ్ర చిత్ర నిర్మాణ సంస్థ హారిక అండ్ హాసిని క్రియేషన్స్ బ్యానర్ లో చిన‌బాబు, భారీ బడ్జెట్ తో నిర్మిస్తున్నారు. పూజా హెగ్డే, శ్రీలీల హీరోయిన్లు. ఇటీవల విడుదలైన మహేష్ బాబు ఫస్ట్ లుక్ పోస్టర్ కి అద్భుతమైన స్పందన లభించింది.
గుంటూరు మిర్చిలా ఉన్నాడంటూ అభిమానులు మురిసిపోయారు. వెండితెరపై వింటేజ్ మహేష్ ని చూడటానికి అభిమానులు, ప్రేక్షకులు ఎంతో ఆసక్తిగా ఎదురుచూస్తున్నారు. సూపర్ స్టార్ కృష్ణ జయంతి సందర్భంగా మే 31న మహేష్ మూవీ టైటిల్ తో పాటు గ్లింప్స్ ను రిలీజ్ చేశారు. మహేష్-త్రివిక్రమ్ హ్యాట్రిక్ ఫిల్మ్ కి ‘గుంటూరు కారం’ అనే పవర్ ఫుల్ టైటిల్ పెట్టారు. టైటిల్ ని బట్టి చూస్తే, ఇది గుంటూరు నేపథ్యంలో రూపొందుతోన్న యాక్షన్ ఫిల్మ్ అని అర్థమవుతోంది.
టైటిల్ ని వెల్లడిస్తూ విడుదల చేసిన వీడియో ప్రస్తుతం సోషల్ మీడియాలో ట్రెండ్ అవుతోంది. కర్రసాముతో రౌడీ గ్యాంగ్ ని చితక్కొడుతూ మహేష్ అదిరిపోయే ఎంట్రీ ఇచ్చాడు. గళ్ళ చొక్కా ధరించి, తలకి ఎర్ర కండువా చుట్టుకొని ఉన్న మహేష్ సరికొత్త లుక్ ఆకట్టుకుంటోంది. నోటిలో నుంచి బీడీని తీసి, దానిని స్టైల్ గా వెలిగించడం హైలెట్ గా మారింది.
ప్రేక్షకుల్లో భారీ అంచనాలు నెలకొన్న ‘గుంటూరు కారం’ చిత్రం సంక్రాంతి కానుకగా 2024, జనవరి 13న ప్రపంచవ్యాప్తంగా భారీస్థాయిలో విడుదల కానుంది. తమన్ ఈ సినిమాకు సంగీత దర్శకుడు. ప్రస్తుతం ఈ టైటిల్ టీజర్ కు సోషల్ మీడియాలో లెక్కలేనన్ని లైక్స్ వస్తున్నాయి. యూట్యూబ్ లో మిలినయ్ల కొద్దీ వ్యూస్ వస్తున్నాయి.
