ప్రస్తుతం తెలుగు ప్రేక్షకులు ఎంతగానో ఎదురుచూస్తున్న సినిమా ప్రభాస్ నటించిన ఆది పురుష్. ప్రభాస్ రాఘవుడిగా, కృతి సనన్ జానకిగా, బాలీవుడ్ నటుడు సైఫ్ అలీ ఖాన్ రావణ్ గా ఓం రౌత్ దర్శకత్వంలో తెరకెక్కిన ఆదిపురుష్ సినిమా ఈ శుక్రవారం ప్రపంచవ్యాప్తంగా వివిధ భాషల్లో ఘనంగా విడుదలకు సిద్ధంగా ఉంది. ఈ సినిమా మేకర్స్, దర్శకుడు కలిసి ఈమధ్య ఓ సంచలన నిర్ణయం తీసుకున్న సంగతి తెలిసిందే.
అదేమిటంటే “రామాయణ పారాయణం జరిగే ప్రతి చోటికి హనుమంతుడు విచ్చేస్తాడు అనేది మన నమ్మకం, ఈ నమ్మకాన్ని గౌరవిస్తూ ప్రభాస్ రాముడిగా నటించిన ఆది పురుష్ సినిమాని ప్రదర్శించే ప్రతి ధియేటర్లో ఒక సీటు విక్రయించకుండా హనుమంతుడి కోసం ప్రత్యేకంగా కేటాయిస్తున్నారు. ఈ మంచి కార్యాన్ని మరింత ప్రోత్సాహిస్తూ, టాలీవుడ్ ఈవెంట్స్ ఆర్గనైజేషన్ శ్రేయస్ మీడియా మరో నిర్ణయం తీసుకుంది.
ఖమ్మం జిల్లాలో ఉన్న ప్రతి రామాలయానికి చెరో 101 టికెట్లను ఉచితంగా ఇవ్వాలని ఈ సంస్థ నిర్ణయించింది. వీటిలో 100 టికెట్లు రామాలయంకు, మిగిలిన ఒక టికెట్ ను హనుమంతుడికి కేటాయించారు. అంటే ఆ టికెట్ లో సీట్ ను ఖాళీగా ఉంచేస్తారన్నమాట. ఇలా ఎన్ని రామాలయాలుంటే, అన్ని ఆలయాలకు 101 టిక్కెట్లు పంచాలని నిర్ణయించారు. శ్రీరాముడు ఆదర్శ పురుషుడు, రామాయణం అందరికీ ఆదర్శం. ఆ ఇతిహాసాన్ని ప్రతి ఒక్కరికి అందుబాటులోకి తీసుకొచ్చే ఉద్దేశంతో, ఈ నిర్ణయం తీసుకుంది శ్రెయాస్ మడియా.
టీ సిరీస్, యూవీ క్రియేషన్స్ నిర్మించిన ఈ సినిమా తెలుగు రైట్స్ ను పీపుల్ మీడియా ఫ్యాక్టరీ దక్కించుకుంది. ఇప్పటికే సినిమా సెన్సార్ పూర్తయింది. 3 గంటల నిడివి ఉన్న ఈ సినిమాకు క్లీన్-యు సర్టిఫికేట్ దక్కింది. ఆంధ్రప్రదేశ్, తెలంగాణలో టికెట్ రేట్ల పెంపుపై స్పష్టత వచ్చిన వెంటనే ఆదిపురుష్ సినిమా అడ్వాన్స్ బుకింగ్స్ మొదలవుతాయి.