రాష్ట్రంలో వైన్‌షాప్‌లకు లైసున్సులు మంజూరు చేసే ప్రక్రియను రాష్ట్ర ఎక్సైజ్‌ శాఖ ప్రారంభించింది. వచ్చే రెండేళ్లకు (2023-25) సంబంధించి లైసెన్స్‌ ప్రక్రియకు ఈ వారంలో నోటీఫికేషన్‌ జారీ చేయనుంది. ఇది శుక్రవారమే విడుదల కానున్నట్లు సమాచారం. అదే రోజు నుంచి దరఖాస్తులు స్వీకరించనున్నట్లు తెలుస్తోంది. కాగా, ఆగస్టు మూడో వారంలోనే లాటరీలు నిర్వహించి షాపులు కేటాయించనున్నట్లు సమాచారం. ఇప్పటికే అన్ని జిల్లాల ఎక్సైజ్‌ అధికారులతో రాష్ట్ర ఎక్సైజ్‌ డైరెక్టర్‌ షారూఖీ, ఇతర ఉన్నత అధికారులు సమావేశం నిర్వహించారు. ఆక్షన్‌ ప్రక్రియపై వాళ్లకు మార్గనిర్దేశం చేశారు.
గత రెండేళ్ల పాలసీనే ఈసారి కూడా అమలు చేస్తారని తెలుస్తోంది. దరఖాస్తు ఫీజు, దుకాణాల సంఖ్యలో ఎలాంటి మార్పు లేదని, రిజర్వేషన్లు యథాతథంగా అమలవుతాయని సమాచారం. 2021-23 సంవత్సరాలకు ఉన్న మద్యం పాలసీలో గౌడ కులస్తులకు 15%, ఎస్సీలకు 10%, ఎస్టీలకు 5% కేటాయించింది.