సినిమాలతో పాటు వెబ్ సిరీస్ ల వెల్లువ కొనసాగుతున్న కాలమిది. పెద్ద తెర కంటెంట్ తో పోలిస్తే ఓటీటీ లో ప్రయోగాలకు ఆస్కారం ఎక్కువ.. పైగా పాత్రల్లో గాఢత పరంగా, ఎంచుకున్న కథలో ఎమోషన్ పరంగా ఓటీటీ కంటెంట్ అద్భుతాలు చేస్తోంది. అంతగా నియమనిబంధనలు వర్తించకపోవడంతో చెలరేగి నటించేందుకు తారలు కూడా ముందుకొస్తున్నారు.
ఇంతకుముందు ఫ్యామిలీ మ్యాన్ సీజన్-1లో ప్రియమణి ప్రయోగాత్మక పాత్రలో నటించి మెప్పించగా.. ఫ్యామిలీ మ్యాన్ సీజన్ 2లో సమంత శ్రీలంక టెర్రరిస్టు పాత్రతో మెప్పించింది. నిజానికి ఆ ఇద్దరికీ ఈ వెబ్ సిరీస్ కెరీర్ పరంగా బిగ్ బ్రేకింగ్ ఎలిమెంట్ గా మారింది. సమంత తరహాలోనే రాజ్ అండ్ డీకే తో కలిసి రాశీఖన్నా ప్రయోగాత్మక వెబ్ సిరీస్ ఫర్జీలో నటించి మంచి పేరు తెచ్చుకుంది.
ఇలా అందాల తారలంతా వెబ్ సిరీస్ లతో సత్తా చాటారు… అదే బాటలో ఇప్పుడు ఇలియానా బిగ్ గేమ్ ప్లాన్ తో సిద్ధంగా ఉందని సమాచారం. ప్రస్తుతం గర్భిణిగా ఉన్న ఇలియానా. ఇప్పటికే ఓ వెబ్ సిరీస్ లో నటిస్తోంది. చిత్రీకరణ కొంచెం పెండింగ్ ఉంది. ఈ ఏడాది చివర్లో ఇది ప్రేక్షకులముందుకు రానుంది. ఇంకా పేరు పెట్టని ఈ వెబ్ సిరీస్, ఇలియానాకు లైఫ్ టైమ్ క్రేజ్ తెచ్చిపెడుతుందని అంటున్నారు నిర్మాత ఆషి దువా.
బీబీసీ స్టూడియోస్ తో కలిసి అప్లాజ్ ఎంటర్ టైన్ మెంట్ ఈ వెబ్ సిరీస్ నిర్మించింది. బర్ఫీ తర్వాత ఇలియానాకు ఆ స్థాయిలో ఈ సిరీస్ పేరు తెచ్చిపెడుతుందంట. తెలుగులో ఒకప్పుడు స్టార్ హీరోయిన్ గా కొనసాగింది ఇలియానా. టాలీవుడ్ లో క్రేజ్ ఉంటుండగానే, బాలీవుడ్ కు మకాం మార్చింది. అక్కడ కూడా బర్ఫీ రూపంలో పెద్ద హిట్ కొట్టింది. అయితే హిందీ నుంచి ఆమెకు అనుకున్న స్థాయిలో అవకాశాలు రాలేదు.
దీంతో ఆమె కెరీర్ డౌన్ ఫాల్ మొదలైంది. ఈ క్రమంలో మరోసారి టాలీవుడ్ లో అడుగుపెట్టినప్పటికీ ఆమెకు కాలం కలిసిరాలేదు. దీంతో బాలీవుడ్ లో మ్యూజిక్ వీడియోస్ సైతం చేసింది. ఇప్పుడు వెబ్ సిరీస్ తో అదృష్టాన్ని పరీక్షించుకుంటోంది.
