తగ్గేదేలే – బిజిబిజీగా స్టార్ హీరోలు

కరోనా తర్వాత స్టార్ హీరోలంతా స్పీడ్ పెంచారు. బ్యాక్ టు బ్యాక్ సినిమాలు చేస్తున్నారు. అన్ని పనులు పక్కనపెట్టి, షూటింగ్స్ కే ప్రాధాన్యం ఇస్తున్నారు. ఇందులో భాగంగా పవన్ కల్యాణ్ వరుసపెట్టి సినిమాలు చేస్తున్నాడు. ప్రస్తుతం పవన్ కల్యాణ్ చేస్తున్న సినిమా ఓజీ. సుజీత్ దర్శకత్వంలో తెరకెక్కుతున్న ఈ సినిమాకు డీవీవీ దానయ్య నిర్మాత, ప్రియాంక మోహన్ హీరోయిన్. ఈ సినిమాతో పాటు హరిహర వీరమల్లు సినిమా చేస్తున్నాడు పవన్. క్రిష్ దర్శకత్వంలో ఈసినిమా తెరకెక్కుతోంది. మరోవైపు ఉస్తాద్ భగత్ సింగ్ సినిమా కూడా సెట్స్ పై ఉంది. హరీశ్ శంకర్ దర్శకత్వంలో ఈ సినిమా వస్తోంది. మైత్రీ మూవీ మేకర్స్ బ్యానర్ పై వస్తున్న ఈ సినిమాలో శ్రీలీల హీరోయిన్ గా నటిస్తోంది. ఈ సినిమా ఫస్ట్ గ్లింప్స్ కూడా తాజాగా విడుదలైంది. ఈ సినిమాలతో పాటు.. వినోదాయ శితం రీమేక్ కూడా పవన్ చేతిలో ఉంది. పవన్, సాయితేజ్ కలిసి నటిస్తున్న సినిమా ఇది. దీనికి సంబంధించి పవన్ తన పోర్షన్ షూట్ కంప్లీట్ చేశాడు. ప్రస్తుతం సినిమా పోస్ట్ ప్రొడక్షన్ స్టేజ్ లో ఉంది. ఇలా వరుసపెట్టి సినిమాలు చేస్తున్నాడు పవన్. వీటిలో ఏసినిమా ముందొస్తుంది, దాని తర్వాత ఏ సినిమా వస్తుందనేది ప్రస్తుతానికి స్పష్టత లేదు. ఇప్పుడున్న సిచ్యుయేషన్ ప్రకారం చూసుకుంటే, వినోదాయ శితం రీమేక్ ముందుగా థియేటర్లలోకి వస్తుంది. దీనికి బ్రో అనే టైటిల్ ఫిక్స్ చేశారు.

పవన్ కల్యాణ్ తర్వాత ఆ స్థాయిలో హయ్యస్ట్ మూవీస్ చేస్తున్న హీరో ప్రభాస్. ఈ హీరో చేతిలో కూడా చాలా సినిమాలున్నాయి. ముందుగా ఆదిపురుష్ తో స్టార్ట్ చేద్దాం. ఓం రౌత్ దర్శకత్వంలో ఆదిపురుష్ సినిమా చేశాడు ప్రభాస్. రామాయణం ఇతిహాసం ఆధారంగా ఈ సినిమా తెరకెక్కింది. మూవీలో ప్రభాస్ రఘురాముడిగా, జానకిగా కృతి సనన్ నటించారు. లక్ష్మణుడిగా సన్నీ సింగ్, రావణుడిగా సైఫ్ అలీఖాన్ నటించారు. ఇండియాలో ఇప్పటివరకు వచ్చిన సినిమాల్లో భారీ బడ్జెట్ సినిమా ఇదే. ఈ మూవీతో పాటు సలార్ సినిమా చేస్తున్నాడు ప్రభాస్. కేజీఎఫ్ ఫేమ్ ప్రశాంత్ నీల్ దర్శకత్వంలో తెరకెక్కుతున్న సినిమా ఇది. శృతిహాసన్ హీరోయిన్ గా నటిస్తోంది. ఈ సినిమా షూటింగ్ దాదాపు పూర్తికావొచ్చింది. ప్రస్తుతం జోరుగా పోస్ట్ ప్రొడక్షన్ నడుస్తోంది. సెప్టెంబర్ లో రిలీజ్ పెట్టుకున్నారు. ఇక ప్రభాస్ నటిస్తున్న మరో సినిమా ప్రాజెక్ట్-కె. నాగ్ అశ్విన్ దర్శకత్వంలో తెరకెక్కుతున్న సైన్స్-ఫిక్షన్ సినిమా ఇది. దీపికా పదుకోన్ హీరోయిన్ గా నటిస్తోంది. ఓ కీలక పాత్రలో బిగ్ బి కూడా కనిపిస్తారు. ఇలా భారీ సినిమాలు చేస్తున్న ప్రభాస్.. అదే టైమ్ లో మరో చిన్న సినిమా కూడా చేస్తున్నాడు. మారుతి దర్శకత్వంలో పీపుల్ మీడియా బ్యానర్ పై సినిమా చేస్తున్నాడు ప్రభాస్. మాళవిక మోహనన్ హీరోయిన్ గా నటిస్తున్న ఈ సినిమా కూడా సెట్స్ పై ఉంది. సైలెంట్ గా షూటింగ్ జరుపుకుంటోంది. వీటిలో ముందుగా ఆదిపురుష్ థియేటర్లలోకి వస్తోంది, ఆ తర్వాత సలార్ సినిమా వస్తుంది. వచ్చే ఏడాది పండక్కి ప్రాజెక్ట్-కె వస్తుంది. మారుతి సినిమా ఎప్పుడు థియేటర్లలోకి వస్తుందనేది ఇంకా క్లారిటీ లేదు.

ప్రభాస్, పవన్ కల్యాణ్ లా తొందరపడడం మహేష్ కు ఇష్టం ఉండదు. ఏడాదికి ఒక్క సినిమా చేసినా చాలనుకుంటాడు. ఒక్కోసారి ఏళ్లకు ఏళ్లు గ్యాప్ తీసుకున్నా టెన్షన్ పడడు. అందుకే మహేష్ నుంచి ఏడాదికొక సినిమా వచ్చే చాలా ఎక్కువ. మొన్నటికిమొన్న లాంగ్ గ్యాప్ తీసుకున్న ఈ హీరో, ఇప్పుడు త్రివిక్రమ్ దర్శకత్వంలో ఓ సినిమా చేస్తున్నాడు. హారిక హాసిని బ్యానర్ పై పూజాహెగ్డే హీరోయిన్ గా తెరకెక్కుతున్న ఈ సినిమాకు తమన్ సంగీతం అందిస్తున్నాడు. శ్రీలీల కూడా ఓ కీలక పాత్ర పోషిస్తోంది. ప్రస్తుతం ఈ సినిమాపైనే ఫోకస్ పెట్టాడు మహేష్ బాబు. ఈ సినిమా షూటింగ్ పడుతూలేస్తూ సాగుతోంది. ఈ మూవీ పూర్తయిన తర్వాత రాజమౌళి దర్శకత్వంలో సినిమా ఉంటుంది. ఈ ప్రాజెక్టుకు సంబంధించి ఆల్రెడీ రాజమౌళి వర్క్ స్టార్ట్ చేశాడు. మహేష్ బాబుతో డిస్కషన్ కూడా మొదలుపెట్టాడు. ట్రెజర్ హంట్ నేపథ్యంలో.. ఇండియానా జోన్స్ తరహాలో ఈ సినిమా రాబోతోందనే టాక్ నడుస్తోంది. ఈ సినిమాను దాదాపు 30 దేశాల్లో షూట్ చేస్తారట. ఈ సినిమా కోసం మహేష్ బాబు మూడేళ్లు టైమ్ కేటాయించినట్టు తెలుస్తోంది. అంతేకాకుండా ఇప్పట్నుంచే బాడీ ట్రాన్స్ ఫర్మేషన్ కూడా మొదలుపెట్టాడు మహేష్ బాబు. సో.. త్రివిక్రమ్ సినిమా థియేటర్లలోకి వచ్చిన తర్వాత, మహేష్ బాబు మరోసారి భారీ గ్యాప్ ఫేస్ చేయబోతున్నాడు. రాజమౌళితో సినిమా అంటే కనీసం మూడేళ్లు పడుతుందనే విషయం అందరికీ తెలిసిందే కదా.

బ్యాక్ టు బ్యాక్ సినిమాలు తీయడమే కాదు, అదే రేంజ్ లో సక్సెస్ కూడా అందిస్తుంటాడు అల్లు అర్జున్. ఈ హీరో నటించిన పుష్ప సినిమా ఏ రేంజ్ హిట్టయిందో అందరికీ తెలిసిందే. దేశవ్యాప్తంగా ఈ సినిమా హిట్టయింది. మరీ ముఖ్యంగా ఇందులో పాటలు, డైలాగ్స్ అయితే దేశంలోని ప్రతి మూల హిట్టయ్యాయి. అందరూ పుష్ప మేనరిజమ్స్ చేయడం మొదలుపెట్టారు. అలా బ్లాక్ బస్టర్ హిట్టయిన పుష్ప సినిమాకు ప్రస్తుతం సీక్వెల్ వస్తోంది. ఈ సినిమా పనిలో అల్లు అర్జున్ బిజీగా ఉన్నాడు మరోసారి మీసాలు, గడ్డాలు, జట్టు పెంచాడు. సుకుమార్ దర్శకత్వంలో తెరకెక్కుతున్న ఈ సినిమాలో బన్నీ సరసన రష్మిక హీరోయిన్ గా నటిస్తోంది. దేవిశ్రీప్రసాద్ సంగీతం అందిస్తున్నాడు. ఈ సినిమా పూర్తయిన తర్వాత త్రివిక్రమ్ దర్శకత్వంలో ఓ సినిమా చేస్తాడు అల్లు అర్జున్. అటు మహేష్ తో మూవీ కంప్లీట్ అయిన వెంటనే, బన్నీ కాంపౌండ్ లోకి అడుగుపెడతాడు త్రివిక్రమ్. అయితే ఈ ప్రాజెక్టులతో పాటు.. సందీప్ రెడ్డి వంగ దర్శకత్వంలో కూడా ఓ బన్నీ ఓ సినిమా చేయాల్సి ఉంది. అదెప్పుడు సెట్స్ పైకి వస్తుందనేది అప్పుడే చెప్పలేం. ప్రస్తుతానికి బన్నీ లిస్ట్ లో అఫీషియల్ గా లాక్ అయిన సినిమాలివే. వీళ్లు కాకుండా వంశీ పైడిపల్లి, వేణు శ్రీరామ్ లాంటి దర్శకులు అల్లు అర్జున్ లిస్ట్ లో ఉన్నారు. వేణు శ్రీరామ్ దర్శకత్వంలో బన్నీ చేయాల్సిన ఐకాన్ సినిమా చాన్నాళ్లుగా పెండింగ్ లో ఉంది. ఈ ప్రాజెక్టులన్నింటినీ ఒక్కొక్కటిగా కొలిక్కి తీసుకురాబోతున్నాడు బన్నీ.

రామ్ చరణ్ కు కూడా ఒకేసారి 2-3 సినిమాలు చేయడం నచ్చదు. బన్నీ టైపులో ఒక సినిమా పూర్తయిన తర్వాతే మరో సినిమా చేస్తుంటాడు. మొన్నటివరకు ఆర్ఆర్ఆర్ సినిమా పనుల్లో ఉన్న ఈ నటుడు, ప్రస్తుతం శంకర్ దర్శకత్వంలో సినిమా చేస్తున్నాడు. దీనికి గేమ్ ఛేంజర్ అనే టైటిల్ ఫిక్స్ చేశారు. కియరా అద్వానీ హీరోయిన్ గా నటిస్తున్న ఈ సినిమాకు తమన్ సంగీతం అందిస్తున్నాడు. అంజలి సెకెండ్ హీరోయిన్. ఈ సినిమా పూర్తయిన తర్వాత బుచ్చిబాబు దర్శకత్వంలో సినిమా చేయబోతున్నాడు చరణ్. యూవీ క్రియేషన్స్ బ్యానర్ పై రూరల్ స్పోర్ట్స్ బ్యాక్ డ్రాప్ లో ఈ సినిమా రాబోతోంది. గేమ్ ఛేంజర్ సినిమా 2024లో థియేటర్లలోకి వస్తుంది. ఇక బుచ్చిబాబుతో చేయబోయే సినిమా 2025లో థియేటర్లలోకి వచ్చే అవకాశం ఉంది. ఇలా ఏడాదికొక సినిమా చేస్తూ కెరీర్ ను మలుచుకున్నాడు రామ్ చరణ్. లిస్ట్ లో మరికొంతమంది దర్శకులు ఉన్నప్పటికీ.. చరణ్ దృష్టి ప్రస్తుతానికి గేమ్ ఛేంజర్ పైనే ఉంది.

ఒకప్పుడు రెండేసి సినిమాలు చేసిన ఎన్టీఆర్ కూడా రూటు మార్చాడు. ఓ సినిమా పూర్తయిన తర్వాతే మరో సినిమా చేస్తున్నాడు. రామ్ చరణ్ తో కలిసి మొన్నటివరకు ఆర్ఆర్ఆర్ సినిమా పని మీద ఉన్న తారక్, ఈమధ్యే కొరటాల శివ దర్శకత్వంలో కొత్త సినిమా స్టార్ట్ చేశాడు. ఇంతకుముందు వీళ్లిద్దరూ కలిసి జనతా గ్యారేజ్ లాంటి బ్లాక్ బస్టర్ సినిమా ఇచ్చారు. ఇప్పుడు రెండోసారి కలిసి పాన్ ఇండియా మూవీ చేస్తున్నారు. ఇందులో హీరోయిన్ గా బాలీవుడ్ బ్యూటీ జాన్వి కపూర్ ను తీసుకున్నారు. సౌత్ సెన్సేషన్ అనిరుధ్ రవిచంద్రన్ ను మ్యూజిక్ డైరక్టర్ గా తీసుకున్నారు. ఈ సినిమాను వచ్చే ఏడాది సమ్మర్ లో రిలీజ్ చేయబోతున్నారు. ఈ సినిమా కంప్లీట్ అయిన తర్వాత ప్రశాంత్ నీల్ దర్శకత్వంలో సినిమా చేస్తాడు ఎన్టీఆర్. అది కూడా పాన్ ఇండియా సినిమానే. అలా తన కెరీర్ లో చేసే ప్రతి సినిమాకు పాన్ ఇండియా అప్పీల్ ఉండేలా జాగ్రత్తపడుతున్నాడు తారక్.

సీనియర్ హీరోల్లో జోరుమీదున్న వ్యక్తి చిరంజీవి. నాగార్జున, బాలకృష్ణ, వెంకటేష్ తో పోలిస్తే.. చకచకా సినిమాలు చేస్తున్న వ్యక్తి మెగాస్టార్. ఓ సినిమా రిలీజైన వెంటనే మరో సినిమాను విడుదలకు సిద్ధం చేస్తున్నారు చిరంజీవి. మొన్నటికిమొన్న వాల్తేరు వీరయ్యతో థియేటర్లలోకి వచ్చారు. అది పెద్ద హిట్టయింది. ఇప్పుడు భోళాశంకర్ సినిమాను విడుదలకు సిద్ధం చేశారు. ఆగస్ట్ లో ఈ సినిమా థియేటర్లలోకి వస్తుంది. ఈ సినిమా ఇంకా కంప్లీట్ అవ్వకముందే, మరో సినిమా ఎనౌన్స్ చేశారు చిరంజీవి. బింబిసార ఫేమ్ వశిష్ఠ దర్శకత్వంలో చిరంజీవి ఓ సినిమా చేయబోతున్నారు. ఇది కూడా పీరియాడిక్ ఫిక్షన్ మూవీగా రాబోతోంది. ఇక ఈ సినిమాతో పాటు కూతురు సుశ్మితను నిర్మాతగా పరిచయం చేస్తూ మరో సినిమా చేయబోతున్నారు. ఈ మూవీకి కల్యాణ్ కృష్ణ దర్శకత్వం వహిస్తాడు. ఈ రెండు సినిమాలు ప్రస్తుతం చిరంజీవి లిస్ట్ లో ఉన్నాయి. వీటిలో ఏది సెట్స్ పైకి వస్తుందనేది అప్పుడే చెప్పలేం. నిజానికి చిరు లిస్ట్ లో వెంకీ కుడుముల సినిమా కూడా ఉంది. డీవీవీ ఎంటర్ టైన్ మెంట్స్ బ్యానర్ పై వెంకీ కుడుముల దర్శకత్వంలో ఓ సినిమా చేయాలి చిరంజీవి. కానీ ఆ ప్రాజెక్టును చిరు పక్కనపెట్టినట్టు వార్తలొస్తున్నాయి. ఓవరాల్ గా చూసుకుంటే, చిరంజీవి చేతిలో భోళాశంకర్ తో కలిసి 3 సినిమాలున్నాయి. పూరి జగన్నాధ్ తో కూడా చిరంజీవి ఓ సినిమా చేయాల్సి ఉంది. కానీ దానిపై కూడా ఎలాంటి క్లారిటీ లేదు.

చిరంజీవి అంత కాకపోయినా, గ్యాప్ ఇవ్వకుండా సినిమాలు చేస్తున్నాడు బాలయ్య. ఓవైపు ఓటీటీ షోలు చేస్తూ, మరోవైపు సినిమాలు చేయడం ఈ సీనియర్ నటుడి ప్రత్యేకత. ఆహా ఓటీటీలో అన్ స్టాపబుల్ షో చేస్తున్నాడు బాలయ్య. త్వరలోనే కొత్త సీజన్ మొదలుపెట్టబోతున్నాడు. మరోవైపు ఆహాకు సంబంధించి ఇతర కార్యక్రమాల్లో కూడా మెరుస్తున్నాడు. ఓవైపు ఇలా ఓటీటీలో కనిపిస్తూనే, మరోవైపు సినిమాలు చేస్తున్నాడు. సంక్రాంతికి వీరసింహారెడ్డి సినిమాతో థియేటర్లలోకి వచ్చిన ఈ హీరో, ప్రస్తుతం అనీల్ రావిపూడి దర్శకత్వంలో సినిమా చేస్తున్నాడు. కాజల్ హీరోయిన్ గా నటిస్తున్న ఈ సినిమాలో బాలయ్యకు కూతురిలా శ్రీలీల కనిపించనుంది. అర్జున్ రాంపాల్ విలన్ గా నటిస్తున్నాడు. ఈ సినిమాకు ఇంకా టైటిల్ ఫిక్స్ చేయలేదు. ఈ మూవీ పూర్తయిన తర్వాత బోయపాటి శ్రీను దర్శకత్వంలో సినిమా చేసే ఛాన్స్ ఉంది. లిస్ట్ లో దర్శకుడు బాబి కూడా ఉన్నాడు. త్వరలోనే బాలయ్య నెక్ట్స్ మూవీపై ఓ ప్రకటన వచ్చే అవకాశం ఉంది. అయితే అనీల్ రావిపూడి సినిమా తర్వాత ఇంకొక్క సినిమా మాత్రమే బాలయ్య చేస్తాడు. ఆ తర్వాత ఏపీ రాజకీయాల్లో ఆయన బిజీ అవుతాడు. వచ్చే ఏడాది ఏపీలో ఎన్నికలు జరుగుతాయి. అవి ముగిసిన తర్వాత తిరిగి తన కొత్త సినిమాలు స్టార్ట్ చేస్తాడు.

లైగర్ తర్వాత కాస్త స్లో అయిన విజయ్ దేవరకొండ మళ్లీ స్పీడ్ పెంచాడు. ప్రస్తుతం శివ నిర్వాణ దర్శకత్వంలో ఖుషి సినిమా చేస్తున్నాడు. మైత్రీ మూవీ మేకర్స్ బ్యానర్ పై తెరకెక్కుతున్న ఈ సినిమాలో సమంత హీరోయిన్ గా నటిస్తోంది. ఈ సినిమా ప్రస్తుతం షూటింగ్ స్టేజ్ లో ఉంది. ఇది పూర్తయిన వెంటనే, సితార ఎంటర్ టైన్ మెంట్స్ బ్యానర్ పై ఓ సినిమా చేయబోతున్నాడు విజయ్ దేవరకొండ. గౌతమ్ తిన్ననూరి ఈ సినిమాకు దర్శకత్వం వహించబోతున్నాడు. ఖుషి సినిమాలో లవర్ బాయ్ గా కనిపిస్తున్న విజయ్ దేవరకొండ, గౌతమ్ తిన్ననూరి సినిమాలో గూఢచారిగా కనిపించబోతున్నాడు. తాజాగా ఈ సినిమా ఫస్ట్ లుక్ కూడా రిలీజైంది. ఈ సినిమాలతో పాటు విజయ్ దేవరకొండ చేతిలో మరో 2 సినిమాలు కూడా ఉన్నాయి. సుకుమార్ దర్శకత్వంలో అతడు ఓ సినిమా చేయాల్సి ఉంది. అలాగే వంశీ పైడిపల్లి దర్శకత్వంలో కూడా ఓ కమిట్ మెంట్ ఉంది. ఖుషి తర్వాత మాత్రం వెంటనే, శివ నిర్వాణ సినిమా మొదలవుతుంది. లైగర్ డిజాస్టర్ తర్వాత కాస్త తగ్గాడు విజయ్ దేవరకొండ. సినిమా కథల విషయంలో ఆచితూచి అడుగులేస్తున్నాడు. అందుకే ఆర్భాటంగా ప్రారంభించిన జనగణమన ప్రాజెక్టును కూడా ఆపేశాడు. ప్రస్తుతం ఈ హీరో ఆశలన్నీ ఖుషి సినిమాపైనే ఉన్నాయి.

ఏడాదికి కనీసం 3 సినిమాలు చేయాలనేది నాని టార్గెట్. కానీ ఈమధ్య ట్రాక్ తప్పాడు. మూవీ బడ్జెట్ పెరగడం, పాన్ ఇండియా అప్పీల్ కోసం ఎక్కువ రోజులు షూటింగ్ చేయాల్సి రావడంతో.. సినిమాల సంఖ్య పరంగా నాని స్లో అయ్యాడు. ఇప్పుడు మరోసారి ఈ హీరో ట్రాక్ లోకి వచ్చాడు. దసరా సినిమా కోసం చాలా రోజులు టైమ్ తీసుకున్న నాని, ప్రస్తుతం చేస్తున్న కొత్త సినిమాను మాత్రం చకచకా పూర్తిచేస్తున్నాడు. శౌర్యవ్ అనే దర్శకుడ్ని పరిచయం చేస్తూ.. ఈ సినిమా చేస్తున్న నాని, మరో నెల రోజుల్లో టోటల్ షూటింగ్ పూర్తిచేయబోతున్నాడు. ఈ మూవీ తర్వాత వెంటనే మరో సినిమా స్టార్ట్ చేసే ఆలోచనలో ఉన్నాడు ఈ హీరో. అయితే అతడి నెక్ట్స్ మూవీ ఏంటనేది ప్రస్తుతానికి సస్పెన్స్. లిస్ట్ లో చాలామంది దర్శకుల పేర్లు వినిపిస్తున్నప్పటికీ.. నాని ఎవరికి గ్రీన్ సిగ్నల్ ఇస్తాడనేది ప్రస్తుతానికి సస్పెన్స్.

ఓ మంచి సక్సెస్ కోసం చాన్నాళ్లుగా ప్రయత్నిస్తున్నాడు రామ్ పోతినేని. ఇస్మార్ట్ శంకర్ తర్వాత ఆశించిన స్థాయిలో సక్సెస్ అందుకోలేకపోతున్నాడు. ఎన్నో అంచనాల మధ్య రెడ్ అనే సినిమా చేశాడు, అది ఫెయిలైంది. ఆ తర్వాత లింగుస్వామి దర్శకత్వంలో వారియర్ అనే సినిమా చేశాడు. అది కూడా ఫెయిల్ అయింది. ప్రస్తుతం బోయపాటి శ్రీను దర్శకత్వంలో సినిమా చేస్తున్నాడు. ఈ ప్రాజెక్టుపై భారీ అంచనాలున్నాయి. ఎఁదుకంటే, బోయపాటి సక్సెస్ ఫుల్ డైరక్టర్. కానీ ఇక్కడ కూడా ఓ బ్యాడ్ సెంటిమెంట్ ఉంది. బాలయ్యకు తప్ప, మరో హీరోకు బోయపాటి హిట్టివ్వలేడనే ఇమేజ్ ఉంది. మరీ ముఖ్యంగా కుర్రహీరోలకు బోయపాటి కథలు, మేకింగ్ సరిపోవనే రిమార్క్ ఉంది. అయినప్పటికీ రామ్-బోయపాటి ప్రాజెక్టుపై అంచనాలున్నాయి. ఈ సినిమా తర్వాత పూరి జగన్నాధ్ దర్శకత్వంలో ఇస్మార్ట్ శంకర్ సినిమాకు సీక్వెల్ చేయబోతున్నాడు రామ్. ఈ ప్రాజెక్టును తాజాగా ప్రకటించారు. బోయపాటితో సినిమా పూర్తయిన వెంటనే ఇది మొదలవుతుంది. మధ్యలో ఓ స్పై సినిమాకు కూడా సైన్ చేశాడు రామ్. గౌతమ్ మీనన్ దర్శకత్వంలో రాబోతోంది ఆ మూవీ. ఇక తనకు ఎంతో ఇష్టమైన కిషోర్ తిరుమల దర్శకత్వంలో కూడా రామ్ ఓ సినిమా చేయాల్సి ఉంది. ఇలా తన లైనప్ ను విలక్షణంగా ఉండేలా చూసుకుంటున్నాడు రామ్. ఒక్క హిట్ పడితే, ఈ హీరో ట్రాక్ లోకి వచ్చేసినట్టే.