సాధారణంగా సంక్రాంతికి పోటీ ఉంటుంది, దసరాకు పోటీ ఉంటుంది. ఇంకా తప్పదనుకుంటే దీపావళికి కూడా పోటీపడుతుంటారు హీరోలు. కానీ ఈ ఏడాది ఆశ్చర్యంగా క్రిస్మస్ కు పోటీ ఎక్కువైంది. దసరాను కూడా పక్కనపెట్టి, క్రిస్మస్ కోసం కొట్టుకుంటున్నారు మన హీరోలు. క్రిస్మస్ కు ఇంకా చాలా అంటే చాలా టైమ్ ఉంది. కానీ ఇప్పట్నుంచి కొంతమంది హీరోలు కర్చీఫులు వేస్తున్నారు.
ప్రస్తుతానికి క్రిస్మస్ బరిలో 3 సినిమాలున్నాయి, అవేంటో చూద్దాం. క్రిస్మస్ సీజన్ పై ముందుగా కర్చీఫ్ వేసిన హీరో నాని. ప్రస్తుతం శౌర్యువ్ అనే కొత్త కుర్రాడ్ని దర్శకుడిగా పరిచయం చేస్తూ ఓ సినిమా చేస్తున్నాడు. ఇదొక ఫాదర్-డాటర్ సెంటిమెంట్ సినిమా. మూవీలో ఓ చిన్నారికి తండ్రిగా నాని కనిపించబోతున్నాడు. మృణాల్ ఠాకూర్ హీరోయిన్ గా నటిస్తుండగా, ఓ కీలక పాత్ర కోసం శృతిహాసన్ ను తీసుకున్నారు. ఈ సినిమాను డిసెంబర్ 21న విడుదల చేస్తామని ప్రకటించారు.
ఇక ఈ మూవీకి పోటీగీ వెంకటేష్ కూడా రెడీ అయ్యాడు. శైలేష్ కొలను దర్శకత్వంలో సైంధవ్ అనే సినిమా చేస్తున్నాడు వెంకీ. ఈ సినిమాను డిసెంబర్ 22న విడుదల చేయబోతున్నట్టు ప్రకటించారు. ఎప్పుడూ పోటీకి దూరంగా ఉండే వెంకీమామ కూడా ఈసారి క్రిస్మస్ బాక్సాఫీస్ వార్ కు సై అంటున్నాడన్నమాట. సైంధవ్ లో రుహాని శర్మ, శ్రద్ధ శ్రీనాధ్, ఆండ్రియా హీరోయిన్లుగా నటిస్తున్నారు.
ఇక బరిలో నిలిచిన ముచ్చటగా మూడో సినిమా హరోం హర. సుధీర్ బాబు హీరోగా నటిస్తున్న ఈ సినిమా విడుదల తేదీని ఈమధ్యే ప్రకటించారు. రేసులో వెంకీ మామ ఉన్నాడని తెలిసి కూడా, డిసెంబర్ 22కే వస్తున్నట్టు పోస్టర్ రిలీజ్ చేశారు. ప్రస్తుతానికి క్రిస్మస్ రేసులో ఈ 3 సినిమాలే ఉన్నాయి. మరో 3 సినిమాలు కూడా క్రిస్మస్ కే వచ్చేలా ఉన్నాయి. అవేంటనేది త్వరలోనే తెలుస్తాయి.
