బాలీవుడ్ అంటే మనోళ్లకు మోజు. హిందీ సినిమాలో కనీసం గెస్ట్ రోల్ పోషించినా చాలనుకుంటారు. అలా పాన్ ఇండియా లెవెల్లో గుర్తింపు వస్తుందనేది చాలామంది ఆశ. ఇప్పటికే చాలామంది హీరోలు హిందీలో తమ అదృష్టాన్ని పరీక్షించుకున్నారు. అయితే ఇప్పుడు ట్రెండ్ మారింది. బాలీవుడ్డే మనవైపు చూస్తోంది.
టాలీవుడ్ లో కలిసి వర్క్ చేయాలనుకుంటోంది. ఇక్కడి మార్కెట్ ను కొల్లగొట్టాలని చూస్తోంది. మొన్నటికిమొన్న బ్రహ్మాస్త్ర ప్రచారం కోసం రణబీర్ కపూర్, హైదరాబాద్ వచ్చాడు. రాజమౌళి కాళ్లకు కూడా మొక్కాడు. సల్మాన్ ఖాన్ అయితే ఏకంగా చిరంజీవి సినిమాలో నటించాడు. ఇప్పుడు చాలామంది క్యారెక్టర్ ఆర్టిస్టులు టాలీవుడ్ వైపు అడుగులు వేస్తున్నారు, కాదు..కాదు.. మన ఇండస్ట్రీ వైపు పరుగులు పెడుతున్నారు.
పవన్ కల్యాణ్ హీరోగా నటిస్తున్న హరిహర వీరమల్లు సినిమాలో బాబీ డియోల్ నటిస్తున్నాడు. ఇక అఖిల్ హీరోగా వచ్చిన ఏజెంట్ సినిమాలో డినో మారియో నటించాడు. ప్రస్తుతం సెట్స్ పై ఉన్న బాలకృష్ణ కొత్త సినిమాలో అర్జున్ రాంపాల్ విలన్ గా కనిపించబోతున్నాడు. ఇక వెంకీ హీరోగా వస్తున్న సైంధవ్ సినిమాతో నవజుద్దీన్ సిద్ధిఖి టాలీవుడ్ కు పరిచయమౌతున్నాడు.
అంతెందుకు.. బిగ్ బి అమితాబ్ కూడా టాలీవుడ్ లో అడుగుపట్టారు. ఇప్పటికే మనం లాంటి సినిమాలో గెస్ట్ రోల్ చేసిన బిగ్ బి, ప్రభాస్ హీరోగా నటిస్తున్న ప్రాజెక్ట్-కె సినిమాలో ఫుల్ లెంగ్త్ కీలక పాత్ర పోషిస్తున్నారు. ఇలా బాలీవుడ్ కు చెందిన ఎంతోమంది నటులు ఇప్పుడు టాలీవుడ్ వైపు వస్తున్నారు. తెలుగు ప్రాజెక్టులతో పాన్ ఇండియా లెవెల్లో మెరుస్తున్నారు.
